Oté

Morso 2. Lo vré zistoir la « Vénus Noire » téi nonm aèl la vénus hottentoteIn l’omaj nasyonal pou la Venus noir

Justin / 6 zanvié 2018

JPEG - 43.6 ko

Mi rapèl sat moin la ékri yèr : moin la artrouv zistoir la dann in zournal fransé. I apèl l’Express. Mi pans moin la fine anparl fam la dann zournal Témoignages nana déza in bon koup de tan. Mé zot i koné : l’istoir sa sé in n’afèr k’i obliy fasilman, ala pou kosa mi anparl de sa zordi ankor pars sanm pou moin sa i amontr tré bien la fason bann z’éropéin, bann blan, téi oi bann noir, z’ot z’ansète konm tout demoun pa tro boushé i koné. Lé vré lo rasism syantifik la fine donn son plas lo rasism popilèr mé lé touzour rasism mèm.

Arivé dann Paris, konm moin la ékri yèr la mète aèl konm pansuyonèr dann in salon libèrtinaz é l’androi la, la fé boir aèl épi abiz dsi èl tout manyèr. Si tèlman son l’éspoir d’viv la vni plizanpli kourt. La mor té i tard pa apèl aèl l’androi nout tout i doi alé.

Kan l’ariv son mortalité…

Sarrtjie lé mor l’az 25 an, son tousèl, abandoné dann in bordèl. El la trap in maladi poumon épi in sèryé fon d’shagrin, d’apré sak i paré. Son kalvèr lété pa fini pars mèm apré mor, kont son volonté, lo bann bann soidizan om de syans konm Cuvier, in shèf dann l’anatomi, la disèk son kor, la koup aèl an morso. La mète son l’éskélète in koté, son sèks in n’ot koté, épi son fonnman in n’ot koté ankor épi la dépoz tousala dann mizé dé l’om épi sa la rèss laba ziska 1970 é d’apré sak i di demoun téi sava dann mizé la pou oir lo bann dékoupaz, épi lo bann désin, déyèr.

Apré l’aparteid, kan lo pèp sidafrikin la ging n son libèrté dépouye la Vénus noir la sort Paris pou artourn l’afrik di sid dannn la provins lo Kap, l’androi èl lé éné. Konm la loi fransèz l’avé pa prévi in ka konmsa la fé vote in loi éspésyal pou pèrmète son rèstann kor rotourn dann son péi. Tabo M’Béki prézidan la répiblik la rann aèl in dèrnyé l’omaj l’ané 2002 lo 30 avril.zour la, l’afrik di sid la rosoi aèl épi la fé in l’omaj nasyonal pou fam la.

La fini

NB Si zot i vé an avoir plis z’informasyon dsi la Venus noir, zot i pë alé dsi internet. Zot va trouv dsi google sansa dsi you tube in bonpé ransègnman dsi la vi madam la é konète in pé los or bann blan la fé aèl dann tan la.