Oté

« Moud mayi sé kriy voizin ! »

In kozman pou la rout

Justin / 14 octob 2016

Ala in kozman i pé pi antann, tro souvan koméla. Pou kosa ? Pars, zordi, na pi plantasyon mayi konm l’avé lontan. Antansyon nana ankor in pé isi La Rényon, mé pa bokou. Na poin lontan, moin la trouv in moun La Shaloup, la di amoin, son famiy nana touzour son minoteri-moulin mayi si zot i vé !- é na d’moun i sort silaos pou fé moud z’ot mayi La Shaloup… Solman, si mi anparl moud mayi, sé pa avèk in gran moulin, mé in pti moulin mayi. Si ou i moud, sé ké ou nana, ké ou i sort ramasé é ké ou la fine fé sèk. Donk sak la poin i vien shèrch in pé, a ashté, mé pli souvan a anprété... Sirtou dann tan mi anparl azot, demoun téi manz mayi, sansa ri-mayi mélanzé. Alé ! Ni arète-la pou l’instan é ni artrouv pli d’van sipétadyé.