Mi koné pa si zot la romarké mé kan parti kominis i désid dir son pozisyon dsi inproblèm li di sa souvan défoi avèk sèryé. Mé la pa pou sa ké bann gran médya i kominik la dsi.

Ni koné Paul Vergès lé mor, é pandan dé zané é dé zané li laranpli lo rol prézidan l’ONERC pou tir lo signal d’alarm dsi lo réshofman klimatik é pou fé avans lo bann solisyon k’i fo pou fé rokil lo réshofman-apèl sa lo dérègloman si zot i vé.

Ni koné galman nout parti la gingn lokaszyon dann son listoir rofléshi in kou dsi tout bann problèm rényoné. Non ? Zot i rapèl pi lo plan d’survi pou nout lékonomi l’ané 1975. Zot i rapèl pi non pli lo plan Paul Vergès la travaye dosi kan li lété promyé vis-prézidan Konsèye réjyonal é Camille Sudre lété lo prézidan. Mi pans zot la antann parl lo plan pour lo dévlopman, l’égalité, épi la défans l’anvironeman. Mi pans mé moin lé pa sir !

Mi pé arète la, mé i fo kant mèm anparl lo 25 propozisyon pou fé avans La Rényon… Biensir la grann prèss épi bann gran radyo épi bann gran télé la pa bate tanbour la dsi é mèm la moukaté. Moukaté nout défans lakane a sik ! Moukaté nout z’idé dsi l’énèrji prop ! Moukaté nout tram-train ! Moukaté nout signal d’alarm dsi lo dérègloman klimatik !

Moukaté ? Oui, mé sa i fé pa avans lo bann solisyon k’i fo... Zordi mi oi in pé l’apré moukate lo diskour Gironcel la parti souf dann zorèye Macron. Zot i oi, nout parti i pans l’afèr La Rényon lé tro sèryé pou k’i pran lé shoz a la léjèr é li yèm-sé son onèr - pran lé shoz sèryèz sèryèzman. Kisa k’i doneré ali tor ? Ban i irl avèk lo lou, mé avè sa i fé pa in mond nouvo. Bien antandi !