Na in somèn par la, moin la aprann in Rényoné banna la nonm ali konm konséyé téknik dann in ministèr. Moin la antann dé-troi radyo apré bat tanbour la dsi, konm pou di gouvèrnman la pa obliy anou. A s’ki paré, la pa vré. I paré sinploman lo moun i fé parti mèm group travay Lionel Jospin épi madam Bachelot dsi la moralizasyon la vi politik. Dizon sé in rokonésans, mé moin lé pa sir lo moun l’avé bézoin in n’afèr konmsa. Pars i paré sa in gran profésèr droi piblik agrézé, épi li la fé avans in téori, sèt lo prinsip l’égalité, in pé dan sans kontrèr lo prinsip la spésifisité.
Mésyé internet la di amoin sa. Moin pèrsonèl, mi konpran pa gran shoz la-dan... Mi koné kant mèm Jean-Paul Virapoullé la tiliz so téori pou "mèt dann marb la konstitisyon" lé intèrdi anou fé bann loi péi... Dann déba parlmantèr, sanm pou moin lété marké, lo gran ziris, in sèrtin Melin-Soucramanien, la pa fé ké done l’idé, li la done osi lo l’argimantasyon pou koup in pé nout z’èl dsi lo késtyonn la gouvèrnans.
Moun kouyon lé danzéré, mé moun danzéré lé pa forséman kouyon ! Mi vé pa anparl mésyé Melin-Soucramanien, mé asiréman mésyé Virapoullé.
Pou kosa mi di sa ? Pars in pèrsone la di amoin konmsa, Virapoullé sé lo boug lo pli danzéré ké nana La Rényon. Pars son bra lé long vèy pa koman, épi son bann tantakil i trap demoun la droite, demoun la gosh, demoun lo santr, étsétéra, étsétéra, la ké lo ra. Touléka, na o-moin inn li koné dann komité Jospin, mé moin lé sir na poin arienk inn.

Justin