Koman in pé d’moun i tramay dan zot koko ? Mi vé konprann, kosa i éspass dann koko in moun pou li azi konm sa ? Kansréti inn ti mizi-ing lésplikasyon, donn a mwin si zot nana, pou mié konprann. Dopi kèk tan mi gingn pi kapar zot manièr d’viv, mi konpran pi. Koman in moun, kiswa in bononm, kiswa in madam i pé toudinkou ronié tout pou in plass ? (Bann la ot i di « ronié papa-momon ») kiswa in plass travay ou kiswa in plass si la lis z’élèksyon ? Koman i pé tourn palto konm sa di zour o landmin ? Ousinonsa koup konm fèy vakoa, trwa koté ? Poitan sa nana dan tout parti mé kan nana out kaz a ou i shagrinn a ou plis sirtou kan lo lésplikasyon ki donn i tyinbo pa dobout. Poukoué ti sava ? Poukoué ti kit ton parti ? Toué lé pi dakor èk nout si lo fon ? Nonva mwin lé dakor, mèm mi di sé zot ké nana la klé pou détak tout, i prézant méyèr prozé, i prétan bon solisyon. Donkalor ?

Kit a ronié a zot zot mèm, zot pasé dopi lontan, défwa tout in vi. Poukoué ? Zot mèm i di « mwin té mérit in plass, la pa donn a mwin »lé pa in pé frazil sa konm argiman ? Lé tann. In bann i di, la pa zordi solman nana sa, dopi la nwi dé tan. Nana i tié mèm domoun pou pran la plass.I tié mèm zot papa. Rapèl a zot dann tan lantikité, In moun té apèl brutus la tié son ti pèr, té in pé konm son papa vik la fé grandi a li, té viv èk son momon, lo ti pèr an késtyon té apèl sézar. Li la tié lot pou pran la plas i di, li té pa sontousèl byinsir, mé li té konplis. Avan mor, Sézar la di « A ou osi mon zanfan ? » zot i wa in pé.

Konbyin moun dan la politik i vé tié sak lé la an plass déza, sak la fé a zot, sak la fé grandi a zot, la fé in moun èk zot, la mèt a zot dann ni. Nana bon pé kiswa dan nout parti a nou, ousinonsa kiswa ayèr, sa i mank pa. I di « mwin osi mi vyinbou fé sa ». Kèl èr ? mank do po, kan lé dan la dans i gingn pi dansé. Dotanplis pou okip nout péi èk tousa traka, i fo a nou moun féré, pa moun gro grokèr, i sava pou in yink-yink, i vann la kourss. I fo anou moun konfians, moun sanmanké, boudikont moun nana lonékté.