Dann son kanpagn, lo Prézidan Sarkho la di : « Moin sar lo prézidan lo pouvoir d’asha ! ». In gayar parol, mé in promès dir pou ténir, sirtou kan out bann zidé i amène aou mazine an promié, pouvoir bann rish, touléka sète nana déza in bon pti moiyin, sète i gingn in bon moné.

Donkalor, dépi in n’an, li souf soman dann nout trou d’zorèy « Pouvoir d’asha ! pouvoir d’asha ! pouvoir d’asha ! Étsétéra, étsétéra, la ké lo ra ». Bann ti-kolon i guète, i guète, i guète mèm, afors guété, lo zié i bril, mé zot i oi pa arien : zot porte-moné lé plate, la bank i gard azot gro zié, dan la boutik, i fo kalkilé avan ashté in n’afèr. Ni domann kossa lo prézidan i fé. Kossa li fé ?

Agard télé, zot va oir. Li fé la piblisité si tout sak li la fé, soidizan pou goumant lo pouvoir d’asha. Zot i kroi kossa don ? Pou li, li la fé sak i fo é sé nou k’lé mèm pa kapab rann anou kont par nou-mèm. Mi éspèr zot tout va rogard la télé. Dabor inn, akoz sa va koute anou kat million l’éro : in piblisié i kout shèr konmsa lé rar, i fo bien rogardé. Épi, nou va oir an dirèk koman li vien a bou roul anou kari sou d’ri.
Soman, pou moin, li l’apré pèrd son tan. Konm di bann z’ansien : « Moun vilin nana, moun kouyon la pi ! ». Kroiyé-moi é fouté vou d’dan !

 Justin