Mézami kan ou lé an parmi l’moune wi pé tonm dsi inn i fé k’ralanti lo mouvman, anpèsh l’afèr tourné.Si tèlman ké li fatig aou afors frène lo zafèr. Ni di li mète lantrak…Mé défoi wi tonm dsi in moune i fé toute pou ké l’afèr i roul ron é sé l’èr ké ou lé kontan .

Lantrak pou mwin sa i vien sirman d’lo mo l’entracte .Dann lantrak la sène i avanss pa é la pyèss i rèss kalé pou l’instan . Ni vé, ni vé pa, mé sa lé konmsa é ni doi abityé anou in sityassion konmsa. Téate sa lé konmsa é la sène i arète dann shak lantrak pars sé konmsa ké lé shoz i spass.

Dann la vi toulézour in moune i mète lantrak sé in gatèr, in lanpèshèr d’tourné an ron é sa sé in n’afèr lé pa agréab ditou.

Alé ! mézami mi kite azot rofléshir la dsi é ni retrouv pli dvan, sipétadyé.