Dabor mwin la trouv dopi son rassine, ziska son po-son lékors si zot i vé — an passan par son fèye, son flèr épi son baton é son bann grin na pwin arien pou gaté dann mourong, so plant mirak i sort dann Linn pa tro lwin l’imalaya dann léta Uttar Pradesh. Biensir mi sava pa dir azot tout sak li ansèrv pars mwin lé sirésèrtin mi sava obliye in bonpé zafèr ladan antouléka sak néna in pyé dann son kour, pran swin, antrotien ali, okip ali konm k’i fo pars an rotour li néna pou rann aou.

Dabor li lé bon pou la santé : Pars li lé rish an sel minéro konm magnésium, potassium calcium, vitamine A, B ; C, E.i pé konsome sa an poud, aval lo grin, shof lo kor pou bronchite, soign diabète, li lé diurétik, laksatif, li tir lo rime dsi léstoma, li lé valab pou fé bèss tanssion,. Néna lo rouz épi lo blan mé lé dé lé gayar pou rofé lo kor. Mi arète la mé sak mwin lé sir kan sar fine fé lékspèrtiz in zour son bann kalité pou la santé é pou soign in bonpé maladi si ou néna in pyé mourong dann out kour ou la pa bézwin kongn, dsi la port doktèr tro souvan.

Astèr pou lo manzé i pé manz lo fèye kissoi an brède kissoi an poude, i pé manz lo flèr an fritir konm guèp, manz lo baton pars son grin par anndan sa lé gouté kan li lé tannn. Biensir i pé pa di li lé nil konm manzé pars li néna bonpé kalité : li lé bon, li lé nouriissan… Mi koné in kamarad i domann touzour mourong avèk sardine an boite dann réstoran kan li sava… Sa i vé pa dir lo fèye mourong na pwin son gouté par li mèm é k’i fo arzout sardine pou donn ali lo gou : inn pluss l’ot é sa lé bien vayan touléka.

Alé ! Mi arète la pars mwin lé sirésèrtin bonpé rant zot i koné pliss ké mwin koman i fo manz sa é sirtou sé pou dir si zot néna in pyé détrui pa li, soi zot na pwin plante ali… Si zot i koné pa fé kuir ali aprann é zot nora pwin pou rogrété sirtou ké li pouss konm mové zèrb.

A bon antandèr salu !

Justin