Dann dèrnié zéléksion, inn-dé mèr la trok lo pa : zot té i kroi zot té sar tié sèt, blès katorz, solman lé shoz la pa éspassé konm zot té i éspèr. Z’ot zéléktèr, zot la touzour flaté, pass korona, rékonpansé, pini galman, "kan té i fo", la anvoy azot baladé. Konm in moun moin té koné té i di : « Lo ropo avèk la bone nouritir la zamé tié son moun ! ». Mé lo ropo, oui, si out kèr lé klèr, si ou nana in traka l’apré fatig aou, lé pa lo mèm zafèr.

Oplis i sava, oplis lo bann nouvo mèr i trouv, konm bann zouar domino i di, zonou dann zé, konm par égzanp in sis kosté koté in blan, sansa d’ot z’afèr ankor. Alor, zot i di nana z’afèr lé pa normal : Sin-Pol, 300 famiy la gingn in total 847.000 éro pou pèy z’ot lo : pou so tarif-la, la pi d’lo, sé d’l’or. Sin-Loui, lo mèr ansien la déside titilariz son bann militan vitman avan zéléksion, mé lo nouvo mèr li la poin larzan pou pèy bann kontra li di lé ilégal. Sint-André, bann krèsh la poin ligiène k’i fo, épi lo pèrsonèl na poin la formasion konm k’i fo... étsétéra, étsétéra la ké lo ra !

Pandan la kanpagn i di sa la krak, la mansonjri, la kalomni... mantèr i prospèr pa. Mé kan la kanpagn la fini, kan lo vré dossié i ariv rant la min lo nouvo mèr, son zié i karkiy, épi li di, la, na z’afèr la pa bon ! Alor, mové lang la di la fé, mé mové lang la di la vérité, mèm moins ké la vérité. Pour sir, nou va artouvé !

* lo rofrin in gayar shanté Afatia.

Justin