Oté

« Mové sizo i pé gate bon toil »

In kozman pou la rout

Justin / 14 zwin 2018

JPEG - 43.6 ko

Kan ou i lir kozman-la, ou lé blijé pans sa sé in vérité vré. Pou kosa ? Pars in mové sizo i mash la toil épi kan ou i éspèr in tayaz bien fran, bien droit, ou i gingn in tayaz an biskankoin é li pèrmète pa pou fé in zoli linz. Kan lo tayaz lé konmsa ou lé riskab an avoir in linz tort, pé sfèr in linz tro kourt. Solman i fo pa obliy non pli « mové zouvriyé, mové zoutiy ». Donk, la pa toultan sizo lé mové, pars tazantan sizo i pé z’ète bon, é lo tayèr adroit konm zozèf a gosh. Arzout èk sa kan dann tout kalité fète désèrtin amizèr i propoz aou in bon l’aparèye pou bien égiz lo sizo, é si lo démonstratèr i nyabou tiliz son l’aparèye, kan ou i sèye par ou mèm lo l’aparèye ou i apèrsoi ou i gingn pa fé arien d’bien. Alé ! Mi kite azot fé travaye z’ot tète la dsi é ni atrouv pli d’van. Sipétadyé !