Matant Zélida la ékrir Justin :
Mon shèr nové, mon spès salté,
Si mi di aou nana in madam moin la aprann aprésyé na poin lontan, mèm si èl lé dépi lontan dan la politik. Pars avan, mi pansé èl lété in bougrès rouj-de-fon. Zordi, mi rann amoin kont par moin mèm, èl osi i détèst bann moun moin la fine pran an grip dopi touzour. Bann moun konm Paul Vergès, Elie Hoarau épi d’ot ankor. In moun i détèst Paul Vergès i pé pa z’èt antyèrman mové konm in pé i di. Moun-la sé Huguette Bello ! Mi pans ou lété fine konprann kisa k’i lé... Figuir azot, èl i pans, si i vé mèt aèl a-mor — konm èl i di —, sé pars èl lé z’anfan pti plantèr. Pli pir, pars èl sé in fanm, é bann Parti kominis i èm pa bann fanm. Mi pans, èl noré pétèt di port plint kont lo parti pou in n’afèr konmsa. Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr,
La ou i sort ékri in n’afèr la fé rès amoin bèt. L’èr-la, nou lé l’ané 2012 ; Mam Bello lé dépité dépi kinz-an é zordi soman èl i pans èl lé viktim pars son papa lété pti plantèr. Bien bon ! Mé nana kinz-an èl lé dépité. Donk l’ané 1997, son papa té pa plantèr vi k’Claude la lès aèl son plas. L’ané 2002, mèm li lété pa. Touléka, si mi suiv son rézonman ! 2007 alor ? Kosa la éspas rant 2007 épi 2012 ? Sa in ka sa ! I shanj pa biltinn nésans kan ou na soisant-an. Sanm pou moin !
Astèr èl i di, sé pars èl sé in fanm k’i anvoy aèl la mor. L’ané 1997, èl té pa in fanm ? L’ané 2002, èl lété pa non pli ? L’ané 2007 non pli ; arienk sèt ané, èl sé in fanm. Fransh vérité, mi konpran pa in mitasyon konmsa. Mutatis, mutandis* ! Pran sa pou ou !

* Sak navé pou shanjé la shanjé !

 Justin