Témoignages - Journal fondé le 5 mai 1944
par le Dr Raymond Vergès

Lakey lo sit > Chroniques > Oté

Mwin la fé in rèv ! Lo zour i ariv, li kongn déza dsi la porte

mardi 10 zanvié 2023, sanm Justin


Mézami mi koné pa si zot i rapèl Martin Luther King in gran méssyé la lite toute inn vi pou labolission bande mézir rassist dann l’Amérik. Mwin mi rapèl ali tré bien, épi son bande konba konte la ségrégassion. Malorozman mi rapèl ossi kan bande rassist l’assassine ali, lo 4 avril 1968 dann la vil i apèl Memphis.


Martin Luther King lé mor assassiné, mé son bande parol lé ankor bien vivan dan la mémoir toute bande konbatan la libèrté. Dann son bande prédikassion li téi anons la fin la ségrégassion rassyal.-noré bonpé pou di dsi labolission réèl, mé ni doi z’ète kontan pars son bande konba la bien fé avanss la koz bande noir laba dann l’Amérik.

Pou kossa mi di sa ankor zordi ?

Pars mwin la di sa galman kan Nelson Mandela épi son bande konbatan la mète in poin final avèk l’aparteid. E sa l’ariv d’in kou l’èrk lopinyon mondyal téi atan mèm pa, mé l’arivé.

Zordi mi di sa pou noute bande frèr é sèr shagossien, pars pou zot ossi lo zour lo rotour i tarde pa arivé. Fransh vérité nou la zamé pèrde kouraj pou zot rotrouv zot péi. Zot léspoir lété si tèlman gran ké nou téi panss lo zour zot rotour téi sava fini par arivé.

Lo zour lé pankor mé li kongn dsi la porte.

A bon antandèr, salu.

Justin


Inn modékri, inn ti lavi, inn komantèr ?

signaler contenu

Plan


Facebook Twitter Linkedin Google plus