Zordi, 70 zan apré, i tonm byin, lé vré sré lèr pou war, dann kèl tramay ni trouv nout péi zordi ? Pétèt néna i di lo bilan lé globalman pozitif, vik ni sort télman lwin, lwin minm, désertin i di ni rotrouv a nou dann in gamat, néna i di nou lé dann in gamat pou vréman sétadir ni bit kont lo mir, nou soré dann in linpass, ni gingn pi alé ni dovan ni déryèr. Sanm pou mwin si néna in mayon té fèb dann la départmantalizasyon sé lo mayon lékol.

Pou mwin lo mayon lékol té fèb pou vréman pou an awar 120000 zilétrés zordi. Lé vré zis apré la koloni, lo nonm kolèz lavé té i kont d’si lo dwa la min, ousinonsa si lavé inn pa tro lwin té pa pou ti kolon, té pou sak navé transpor, kiswa loto papa ousinonsa in vélo, é kisa navé vélo dann l’tan ? Lavé in sèl lisé la rényon, in lisé pou 250000 zabitan, lo dézyinm l’ariv dan lo sid an 68.

Mi pans tousala la zoué in rol dann nout rotar. Tozour la, an 2010, talèr navé 50 pour san bann zènn navé pwin travay, té i sar pi lékol é an plis té san formasyon. Mi pans lékol na lo dovwar pran an kont la sityasyon bann marmay déza pou viv, pou travay é boudikont pou èt an kapasité pran an min lavnir nout péi. Mi sort diskit èk in zènn tèr la, li di a mwin konm sa, monn ti kontra édé la fini, sominn proshinn mi sa war lo mèr é aprésa li di “lé normal mwin la pa parti in grin lékol“.