Médame zé méssyé, la sossyété, koze èk mwin sé koze èk in kouyon, mé sé o pyé d’lo mir k’i oi lo masson.

Mézami fitintan shapo té in n’afèr inportan pou nou rényoné. Téi sorte pa san shapo. L’avé mèm demoune téi tire pa zot shapo kan zot téi rante dann zot kaz. Mi rapèl in tan mon kaze té koté la kaze in madame téi apèl Madame Tam é son nové téi rèss avèk èl é in soir mwin la antande : « Zilbèr, domin wi sava dann biro bande blan : wi tire oute shapo, pars in om avan toute sé in shapo. ».

Mwin pèrsonèl, mi panss sa i doizète in tradission té i romonte lésklavaz : zésklav téi marsh tète tou-ni é lo mètre l’avé son shapo dsi son tète é son madame téi mète kapline. Sito lib, lo lansien zésklav téi mète shapo, linz koulèr é son madame té fagote in kapline. Alor si mi di mwin la pa pèrde lo droi porte shapo, sa i vé dir mwin lé pa zésklav pèrsone. Konpran sak lé pou konpran.

Alé ! Ni artrouv pli d’van. Sipétadyé.