Akoz pa lo pri l’éssanss an bèss ?

Sirman mwin noré vi, konkrètman in miniss an plène kapassité son bann moiyin kossa li lé kapab fé pou nou dann noute sityassion par raporte noute bann problèm. Pars dopi lo komansman son sézour li la bien fé konprann anou k’avèk li lé shoz téi sava pa pass konm avan é si téi falé sévir konte dsi li pou sévir. Nou va oir, nou va oir, sak nou va oir.

Donk mwin té i atann lo zanons é mwin té i di dann mon kèr lé sir lo miniss i sava mète kao la vi shèr é lokazion lété bon pars lo promyé i spass touzour kékshoz é so kékshoz — la sé lo nouvo pri bann karbiran… lo traka bonpé demoune issi kan i ariv lo moi nouvo. Shakinn i di : i goumante i goumante pa, i bèss i bèss pa ? Sirman i sava fé in zèss é si l’éta téi fé konm la Réjyon avèk lo départman. Banna la blok lo gaz é si l’éta téi blok l’éssanss. Oila de koi fèrm lo také in pé k’i panss l’éta i pé pa arien kont la vi shèr.

Sa i tonb bien, yèr matin mwin l’avé bézoin mète inn-dé dégou l’éssanss dann mon kok loto. Oila ké mi sava la stassion pou mète l’éssanss kèr klèr, kontan vèye pa, sir ké mon rèv i sava rante dann la réalité mé oila mwin lété pankor ariv laba ké la radio té fine anonss la goumantassion lo pri sipèr épi lo pri gazoil. Pinss amwin ! Mé mwin lé bien révéyé, é l’éssanss la goumanté mèm é anpliské sa, dann in zoinal téi di la pa fini pars bann prodiktèr, patati, patata, dë kanar pou in poul étsétéra étsétéra la ké lo ra.
Néna dé zour i vo myé rèss dann li pou pa aprann mové nouvèl. A bon antandèr.

Justin