Si sak mi di lé vré — si lé pa vré tanmyé ! — sa i vé dir ké dann noute lang de néssans ni gingn pa bate karé bien konm k’i fo dann toute karo noute konéssans é i fo rokonète sa lé bien domaz.

Pou kossa ?

Pars dann noute lang de néssans nou l’aprande kozé, nou l’aprande ékouté, nou l’aprande di lo nom bande shoz, mèm nou l’aprann pti pa pti pa dékouvèr la vi : noute sink sanss la révéyé kan l’ariv zot lèr é oila poitan ké ni panss dann noute lang-la ni pé pa di toute sak ni vé di. Si sa lé vré dizon nou lé anputé kékpar, la koupe anou kékshoz éssanssyèl pou noute pèrsonalité pou noute prop lidantité.

Lé domaz, mé lé pa tro étonan pars la plipar rante nou kan nou la pass baro lékol la bien fé konprande anou, kréol-la i fo fini èk sa : « Lé défandi koz kréol épi krash a tèr, konm téi di lontan pou dmoune téi koz la lang breton. » — a partir zordi é mèm ofisyèlman mi panss in pé la di dann zot kèr, kréol-la i fo ni fé obliye ali sa, inn bone foi pou toute. I fo tinde son lanp.

Mé oila, lé shoz i pass pa touzour konm ofisyèman in pé i kroi. Pars a bien rogardé : nou la pass nèf moi dann vante noute momon, nou la konète bande marmaye lékol é sirman nou l’aprande pliss shoz avèk zot ké avèk lo monde ofissyèl. Konm i di pou lédikassyon in marmaye i fo tout in vilaz é néna dé shoz a aprande dann vilaz-la. Nou lété pa karsséré é nou la bien konprande otour d’nou noute pèp lé apré lité pou retrouv son lidantité é koman — koman nou ossi nou la rante dann trin-la konm i di pé ou prou.

Alor, rantre nou, mi panss sèryèzman nou néna moiyin pou ansèrv noute lang kréol rényoné, é si ni vé bien domin sansa apré avèk noute lang kréol rényoné nou sar kapab vizite bien konm kifo lo karo noute konéssans é donk ansèrv noute kréol pou di toute sak i pass dann karo-la. A biensir nou néna noute kontradikssion, mé la pa sa va anpèsh anou avanssé.

Abon antandèr, salu !

Justin