Poitan néna l’ékol issi oui : la plipar bande marmaye i sava lékol l’ané zot troizan épi i kontinyé alé lékol ziska l’az sèzan... Mi koné pa kossa bande zékspèr i panss de sa ! Sépa noute tète anou kréol lé pli dir sate lé zot ! sépa la lang bande franssé l’apré amaye anou, fou dann fon. Antouléka, la réalité lé la, é néna touzour in gro paké d’moune lé illétré dann la lang franssè issi dann noute péi...

I paré néna in métode i marsh é métode-la té invanté par bande kubin.Dann la lang éspagnol i di « Yo si puédo »- sa i vé dir « mwin ossi mi gingn  » an kréol. I aparé métode-la i adrèss demoune i parl in pé toute lang : kissoi l’éspagnol, kissoi bande lang zindien, kissoi déssèrtin kréol. Antouléka i paré sa i marsh.

Mi sorte lir dann zoinal banna la fé léspèryanss métode –la dann la komine Sin-Pol. Mi koné pa lo rézilta mé mwin lé kiryé d’konète pars sa i voudré dir néna o moinss in tik-tak pou aprande lir ékrir i marsh ossi La Rényon.

Yèr soir l’avé in konféranss dsu métode-la avèk bande spéssyalist kubin épi lo proféssèr Salim lamrani pou inform demoune dossi métode-la.Biensir, gran kèr mi sava konféranss-la é mi éspèrcinn dé sé zour nou nora bon nouvèl isi shé nou késtyonn lilétrism. Si sa i bèss dann tan, sar in bien bon nouvèl.

NB. In kassaz lé kui pou fini mon modékri. I paré Clémenceau téi di : « La guèr sé in n’afèr tro sèryé pou done sa bande militèr pou fèr !  ». Mi koné pa si ni pé dir : «  L’amontraz lir ékrir sé in n’afèr tro sèryé pou done sa l’édikassion nassyonal pou fèr. »... I fo kroir si i baze dsi lo bande rézilta.

A bon antandèr salu !