Oté

Mwin pèrsonèl mi wa pa d’ote solission ké sa, mé fère é dire la pad itou lo même zafère

Justin / 2 out 2021

JPEG - 43.6 ko

Mézami, mi koné zot i suiv laktyalité lanvironeman, a titré, é pa arienk zordi é mwin lé sir galman la nouvèl nou la aprann somenn issi lé pa fé pou kontante anou. Kossa nou l’aprann ? Dann télé, dann zoinal, in pé dann toute landroi i anparl pa arienk lo shien krazé konm i di nou l’aprann nou la mète sète moi pou konsome toute noute bande rossours pou l’ané.

Mézami si ni kalkil toute dépanss ni sava fé pou noute bézoin pandan inn ané, kan v’ariv trantéin déssanm, lé possib i rèss arpi nou arien. Lé pa dramatik pars landomin ni komanss in nouvèl ané é ni èspèr, l’ané ki vien sar konm l’ané k’i fini ; in bon lékilib rante noute dépnss épi noute rossours. La pa in gran zafère, mé sa i doi éspass konmsa shak ané pou la plipar d’moune..

Mé kossa ni diré si kan i ariv 31 zilyète nou la fine dépanss pou l’ané ? Ni diré, koman ni sava fé pou ariv trantéin désanm ni diré noute poi lé o fé é ni oi pa koman ni sava fé pou fini l’ané si dann sète moi nou la dépanss pou douze. Zot la konprann amwin, mi parl an parabol é tazantan in konvèrsassionanr parabol lé pa si mové ké sa.

La vérité sé koi, la réalité d’térin sé koi ? Sinploman ké toute demoun i viv dsi la tère néna in kantité rossours pou dépanssé é pou konsomé é ké si nou-la popilasyon la tère-si nou la fine tliz toute noute rossours lané an 7 moi, ni pa mor noute toute mé ni manz a krédi ziska la fin d’lané é nou nora ankor pliss difikilté pou l’ané proshène é domoune maléré nora ankor pou soufère pliss l’ané proshène. Sa sar vré ané pou ané, épi sirman dramatik si i kontinué konmsa.

Alor kèl solission ? Ni produi pluss, mé lé pa touzour possib an touléka dopi kék dizène zané, é néna plizanplis demoun pou okipé. Donk la pa in bon solission ! Evite lo gaspiyaz ? Sa i pé z’ète in bon solission, mé pé s’fèr sar pa sifizan. Alor i fo rovoir noute prodiksyon épi noute konsomassion pou rovnir in méyèr lékililib – ni pé apèl in lékilib vital pars la vi d’moune dsi la tère i dépande sa.

Mwin pèrsonèl mi wa pa d’ote solission ké sa, mé fère é dire la pa lomème zafère.