Mi souvien in foi, in vyé kamarad, zordi la fine sote la vi, la pran la kolèr. Pou kossa d’apré zot ? Pars, pou li, té i parl tro déssi lanploi bann jenn nana diplome, é té i pans pa, an parmi, sak na zis in bak pou bril la salté dann fon la kour... Solon li, li té i antann souvan parl déssi la késtyonn bann bak+ é près pa ditou déssi toute sak la parti lékol, mé la arsort san riyin. Biensir, nout vyé kamarad lavé poin la konésans bann shif l’INSEE, mé dann son bann konésans, li té i voi bien problèm-la té grav.

Mi sort lir dann zournal samdi léspès malédiksyon i pèz déssi bann jenn an zénéral, épi déssi bann jenn na poin diplome vi k’an parmi bann shomèr, nana 57% d’moun na moins trantan, é na poin diplome.

Zot va dir amoin, in shomèr sé in shomèr : jenn li, vyé li, instruyé li, san diplome li, shakinn i koné son doulèr, shakinn i koné son soufrans, shakinn i koné son mizèr. Mé, solon moin, i fo fèr in zès séryé pou sak lé pli frazil, pou sak lé san soutyin. É nana si tan tèlman lé dann tablatir shomaz…

Zot va dir amoin, dir sa, sé konm si i prèsh dann dézèr konm in sèrtin Saint Jean-Baptiste... Mé, parlfète, dé foi, i vo myé in voi, mèm si i kriy dann dézèr, k’okin voi ditou !

Justin