Matante Zélida la ékrir Justin :
Mon shèr nové, mon spès salté,
Mi éspèr zot la bien agard koman lo pti t’om la vni in vré shèf la guèr, koman li la pass Kadafi in bon kalpyé. Koman, konm karnaval lontan té i di : « sote koman ti vé koko, toué lé pri dan la min korbo ! Oué ! ». A ! Ala in boug té apré fé son l’intérésan, té apré koz tor-antravèr, konmsi lo mond antyé té apré ramas brède pou li. Mi di aou, li la mal tonbé avèk lo pti t’om. Tout in bann péi la asosyé pou ramène lord dann péi Libye. Mèm bann gran péi konm l’Amérik té oblizé mète son fyèrté dann son tante kouvèrt épi mète an ran déyèr lo pti Fransé. L’èr-la, lo Kadafi l’apré kass par boute, l’arète bonbard bann moun èk son bann l’aviyon. Mi koné pa si l’Kadafi sé in rouj de fon, touléka li na l’èr é la manyèr. Rozman lo pti t’om lé la ! Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Moin té ki kroi, ou té i sar anparl amoin zéléksyon Konsèy zénéral, moin ! Pars i prétan zot parti l’UMP la pran in kou d’pyé sou la lang pa ordinèr, in bat-lavé vèy pa... dizon in kou d’pyé bourant dann son nom-di-pèr ; Ou i koné, rézilta banna la fé la-ba, mèm issi, lété pa a vanté. Moin té zot, moin té i kour kashète. Matant, in sèl léspoir moin nana èk mon bann dalon, sé k’i bate Sarkozy déor l’ané proshène, é manyèr ki fé, mi pans sa mèm son kado pou l’ané 2012 ;
Astèr, ou i anparl amoin la guèr dann la Libye. Pou ou, tout lé fasil, tout lé klèr, tout lé gayar. Mi di pa arien ! Mi tir pa plan déssi létoil filante. Solman, moin lé a d’mandé koman sa i sava fini. Mi éspèr i sava pa fé konm l’Irak sansa l’Afganistan... pars i koné koman i komans, i koné pa koman i fini. Fransh vérité, mi souète ziska so z’afèr-la i fini pa an boi pointi.

Justin