Mé zami, néna zordi sinkant sink zour nou lé an konfinaz. Sa i fé in bonpé sa : in bon lokazyon pou in gouvèrnman répète son bann game. Dsi l’ékonomi, dsi l’sostyal, dsi la santé é nou la romarké li la répète son bann game-la ziska l’infini.

La anparl anou in maladi pèrsone i koné pa éi koné pa non pli songné, mèm vaksiné. La anparl anou l’indistri, lo komèrs, lo batiman l’agrikiltir. La parl anou ankor lo shomaj tan konplé sansa tan parsyèl. La diskite dsi lo moiyin pou moiyéné kan ou lé an konfinaz é konm kan ou i trikote i fo ou i détrikote la ankor anparl anou dékonfinaz. La pa mank anparl anou la solidarité épi tan é tan d’zafèr.

Mé oila, néna in kékshoz bann tète fromaz la obliyé sé la kiltir épi léstatu bann z’aktèr kiltirèl. La obliyé ziska yèr, pars yèr solman lo pti prézidan la désid réponn bann zaktèr kiltirèl. Dopi plis sinkant zour i anul, i anul, i anul ankor é i sousyé pa dsi la sistyasion bann zaktèr kiltirèl.I d’mann pa si banna lé pa apré manzé patat avèk la po sansa san la po.I domann pa kosa zot sédik i doviien. Si tèlman bann zaktèr kiltirèl lété fini par domann azot si zot lé kantité néglizab dann in gran nasyon kulturé konm La frans.

I fo dir in n’afèr kiryé : lo minis la kultur la gingn la maladi é gouvèrnman la pa pans ranplas ali. An kontrèr la pa fé in kont sanm li konmsi – é mi pans lé vré dann zot léspri-la kultur sé kan tité néglizab.

Anfin yèr la désid kozé.. Pétèt domin va anparl l’éspor so kou isi. An touléka myé vo tar ké zamé-Sinkant sink zour zot la mète pou ariv ziska la kiltir : shomin granboi té long foutor ! Myé vo tar ké zamé, vyé motar ké zamé.