Si zot i boir kafé, moin lé sir, la fine ariv azot konm l’ariv amoin in drol léspèryans. Mazine azot, zot i rant dann in pti bivète pou boir in tass kafé. Mank de po, kankrola la fine marsh dann sikriyé. Donk lo sik la fine pran in drol de gou é ou i trap l’anvi ranvoiyé... Kosa i arète pou fèr ? I arète azot arienk pou zète lo kafé, sansa arkrash ali.

Pou kosa mi rakont sa ? Touzour par raport moush-a-myèl épi moush blé. I prétan dir, kan bann moush blé la fine vol-vol dann flèr... ninport ékèl ! Moush a myèl, i sava maron, pars lodèr moush blé i santi si tan tèlman mové pou zot. Moin lé sir, in pé va trouv mon kozman égjajéré, mé sa in n’afèr bann zélvèr moush-a-myèl la fé la romark par zot mèm. Touléka, sa sé in n’afèr i fo suiv de pré épi bann savan i doi intérès azot.

Pou kosa ? Pars, pou komansé in pé la fé vni so moush blé dépi bann zil Molluk pou élimine rézin maron. Lo rézilta lé la, rézin maron lé fouti, in pé partou... rézin maron é lo myèl rézin maron. Astèr si lo moush blé i kontinyé son déga konm moin la di an-o-la, bann zélvèr moush sar an danzé. Bann zélvèr moush solman ? Non va, tout bann prodiktèr sak la bézoin zabèy pou fé gonn zot plantasyon. nout natir mèm sora an danzé, si i kontinyé.

Touléka, d’apré sak moin la tandi dann télé, Myèl Vèr sète ané, i éspass san myèl La Rényon. Sé sak in plantèr la di é bann z’imaz té i amontr bien so z’afèr-la. Sa sé in n’afèr i doi trakass tout bann résponsab La Rényon.
Dévir lo do avèk la réalité, i ansèrv de riyin, konm kashyète son kor déyèr in zèrb Sin-Pol.

Justin