Mi sort oir kékpar sa in poverb komorien, mé mi pans li la pa arienk komorien vi ké mi koné ali dopi lo tan moin lété in pti. An tou lé ka, sak moin lé sir, néna provèrb-la in pé dann tout péi. Lontan moin la pans kozman-la lété vré pou vréman : lé vré la vérité tazantan i fé mal. Sa lé sir ! sirtou si s é in vérité ou i vé pa toulmoun i koné épi i port dsi in n’afèr lé pa aprésyé dann la sosyété. Mé zordi mi poz amoin kant mèm in késtyon : mi domann amoin si in mansonz i ariv pa fèr pli mal ké la vérité é arzout èk sa si demoun ou lé a dalonaz avèk i kroi lo mansonj. Mi pans, sa i fé mal kant mèm pliské la vérité sirtou si ou na poin lo moiyin fé konète lo vérité. Sa lé bien vré dann la politik sa ! Mèm dann la vi anparmi la sosyété. Alé ! Mi kite azot rofléshi la dsi é ni artrouv pli d’van. Sipétadyé.