Dépi inn-dé zour, i antan arienk zafèr konmsa : in koté, nana in moun i sote par-dsi lo rébor in pon, épi i palank son kor dann fon ranpar, in marmay i rant dann in bassin, épi i noiye, inn-dé i vol in loto i pèrd kontrol, épi inn an parmi i mor... Parl pa bann zaksidan, bann loto volé, toussa-la. Ou i diré la mashine la déréglé, èl i marsh pi konm k’i fo.

Soman, si ou i rogard bien, ou an apèrsoi dan la sosiété mèm nana in bonpé zafèr i tourn pa ron : i rash travay dan la min in bon pé “prékèr”, i rash manzé dan la boush z’ot zanfan ; la vi lé pliz-an-pli shèr, na pi d’rapor avèk lo moné bann ti-kolon i gingn ; bann diplomé i trouv pi travay ; gouvèrnman i koup larzan la mobilité ; tro demoun i fé kalité biznèss pèrsone i vien pa bou kontrolé. Nana pou rodir ossi déssi la manièr i amène la politik issi-mèm : in pé i koné arienk la démagozi, la corruption, la malonèt’té, zot i manié larzan pou gard z’ot pouvoir...

Sa i arshèv mète dézord dan la sosiété dézékilibré. Lé vré, nou na pi lo train. Lé vré, tram-train la pankor fine fé. Soman dé foi, nout péi i déraye... Konm si léguiyèr la larg tout zafèr an plan, épi la parti bate karé.

Justin