Médame zé Méssyé, la sossyété, koze èk mwin sé koze èk in kouyon mé sé o pyé d’lo mir k’i oi lo vré masson.

Mézami kozman mwin la mark an-o la sa in provèrb bien koni shé noute bande frèr-sè antiyé. La pa bézoin ou néna bak +24 pou koprande kossa sa i vé dire sanss prope, mé sanns figuiré sa i vé dir na poin laz pou mor : wi pé mor vyé, wi pé mor zinn, wi pé mor ninporte kèl laz.

Sa i fé panss amwin zistoir mon gran-pèr la rakonte amwin. Li lété vyé konm Hérode é li té sava réguilyèrman lantèrman bande pli zinn ké li, si tèlman li téi konpran l’moune téi fini par trouv li noré té myé plassé étan mor ké vivan. Sé pou sa li téi kalkil in fraz dann son tète pou di sa lo zour in moune noré fé tro voir ali son laz é zour-la l’arivé kan inn la di ali : « Mé ou lé ankor la don ou ? » ; li la réponde sinploman : « Vi koné néna pliss zinn bèf i sava labatoir ké ban vyé. ».

Alé ! Mi kite azot rofléshi la dsi é ni artrouv pli d’van. Sipétadyé.

Mango mi ka rété an pié, mango vèt ka tonbé : kozman bande zantiye.