Nou na in minis kondisyon la fame an Frans ; na in tan té apèl sa « de la kondisyonn féminine » ; zot i an souviin Simone Veil –él té minis la Santé-la fé voté in loi po rann lavortman konform ék la loi, i apèl sa IVG ( Interruption Volontaire de la Grossesse), sa té an 1975.

Avan té i fé sa an klandestin, avèk pa tro d moyiin liziène ; ék zéguiy a trikoté ! In véritab masak ; in mank respé foutor, té i antriinn zinféksyon si zinféksyon, lafièv i arèt pa é pi a la fin lo madame i pas é i trépas ; pa in bon zafèr po la sosiété ; donke la loi la aport in progré ; okin dout ladsi.
Sak moin la zamé konprann, sé kan i domann o mari - kan la fanm lé marié - si lo bononm i aksèp par égzanp lo ligatir lé tronp son lépouz ! Moin la zamé konpri so loi !
Din koté ti di in zinn fi, minm minèr, na droi pran pilil san dmann lo paran é de lot, ti dmann o bononm lotorizasyon anlèv in nafèr dan lo kor son fanm… moin la zamé konpri !

Pars si domin lo koup i ariv a divorsé, lo fanm i pé pi avoir zanfan é lo mari (ansiin mari) la partisipé a sa ; kèl droi li nana si lo kor son fanm ?
Sé konm si ou dmann lo fanm lotorizasyon koup si son bononm son bann kanal spermidukt sak i aminn son sperm dépi son testikil ziska déor po fékond la fanm !
A koz na pa in loi po sa osi ?

Alor moin marié mi ankouraz mon fanm domin, minm si él lé pi mon épouz, pi fé zanfan !
Na in nafèr lé pa normal laddan ! Sa mi konpran pa dan so loi domann lo mari si i pé ligatir lo tronp son fanm !
Moin lé pa tro dakor èk sa !

 Justin