Somenn pasé l’avé in pèl mélaz dann radyo dsi la prime : in pé i di zot i gingn pa é lé pa jis, in pé i dizot i gingn é sé la zalouzri k’i fé bate la lang in pé. Na ziska in pé i di i fo arète avèk so bann larzan k’i antrotien la parès. Brèf ! Zot i koné koméraz kréol pou la késtyonn larzan.

Sa sé badinaz kréol rantre zot, mé nana osi sak désèrtin moun étranj i di dsi nou. I krétik lo rmi, lo rsa, lo pti kontra, lo pti rotrète, la povrété d’moun i pous-solon zot-bèl bèl sharyo marshandiz dovan zot… Lé pa rar antann dir ni anprofite l’arzan é nou lé parès konm lo shien… In moun étranj la pankor débark Zilo, li pans li la fine konprann anou myé ké nou mèm ni koné anou. Nitil dir azot nana rényoné i bate tanbour sanm sa é i donn azot rézon.

In pé i apèl sa lo rasis sosyal : lo pov nana tout défo é lo rish tout kalité, lo pov na poin okin mérit é lo rish lé méritan mèm ; lo pov sé lo l’asisté. Final de kont, lo rényoné an zénéral lé konmsa osi pou désèrtin moun étranz konm désèrtin moun La Rényon : li réklam lo bèr, l’arzann lo bèr é la krémyèz an pliské sa.