Mézami dsi la tèr néna in pé i yèm la kantité, d’ote i yèm la kalité. Sak i yèm la kantité i yèm la kantité, mèm défoi i manz konm goulipia. D’ote i èm lé bone shoz… Konm mi rapèl in gramoune téi di mi ve in pti pe mé dé bone shoz.

Sak i di dé shoz konmsa i pé dir zot néna bone boush-i pe dir zot lé délika. Souvan bann maman kan zot i parl zot zanfan i di : mon pti kaf néna bone boush é sé i aparète in pé konm in konpliman zot i adrèss zot zanfan. Lo zanfan lé kontan, la momon lé kontan lanbianss lé bon dann la famiye. Konm i di lé shoz i roul ron konm la boul karé dsi la tab plate... In léspréssion mi konpran pa tro lo sanss é mi di i di sa sirtou pou farssé.

Alé ! Mi kite azot po kalkil sète afèr-la é ni retrouv pli dvan sipétadyé.