Mézami, souvan défoi néna parol shanson i tourn, i tourn, i rotourn dann oute tète é li rèss la lontan é wi diré li va rèss la toultan é zamé li va sorte dann oute koko. Souvan mi rapèl bann parol in shanté i apèl « Bato fou ». Lo parol sé Axel Gauvin la ékri é la mizik sé Ziskakan.

Bann parol lé plissk’intéréssan, mi diré mèm zot lé politik épi filozofik, zot lé idantitèr kan zot i di :

« Domin la nèz va komanss tonbé. Na konète noute doulèr, na konète noute soufranss kan noute péi sar kosté sanm La franss. ».. Kossa zot i rossan ladan zot ? Pou mwin néna konm in dézèspoir inkroiyab d’pi ète nou mèm, é d’ète forssé d’travèrs loséan pou amar anou avèk in péi nou lé distanssé par dis-mil kilomète.

Biensir la mizik i zoué son rol galman avèk son pti pinssé d’gitar ké wi antan shakéstan dann oute zorèye si tèlman ké parol é mizik sé in lantité wi gingn pa séparé.

Alé ! Mi kite azot rofléshi ladsi é ni artrouv pli d’van, sipétadyé.

Justin