Dann télé, nana in patron la bank, té apré di, la sitiasion La réunion la pa si tan tèlman pir k’sa : nana rienk 30% shomèr, trant-pou-san soloman. Sa in bon kozman sa !

Mi kalkil kisa an parmi l’moun mi koné lé dan lo bann trant-pou-san. Ana, oui an gaspy ! Mi sèy mazine, kosa so moun-la i sar fé in gran zourné koman zordi, kisa zot i sa oir, kèl koté zot i sar asiz-kat-pat avèk bann dalon konm zot mem, kas la blag, bat kart, agard domoun pasé, an biang, an misoukant. Koman zot va sèy fé pou trouv dann zié désèrtin moun in pti pé la konsidérasion, kansréti sak banna nana pou zot shien. Salté d’shien, mi foutré sa in rès trankil !

In pti mamzèl i pas : mon dié konm èl lé kalou, konm èl i san bon, gard solman son sa-pou moin, sa pou toué. Mon dié ! na poin arien pou moin la-dan, na poin arien pou bann trant-pou-san. Akoz in gran siklone delo, sansa in tsunami, i kraz pa lo pé, i tié pa tout !

Justin