Oté

« Na poin lion dvan la port ! »

In kozman pou la rout

Justin / 20 zanvié 2021

JPEG - 43.6 ko

Médam, zé méssyé, la sosyété, koz èk mwin sé koz avèk in kouyon mé sé o pyé d’lo mir k’i oi lo masson. Mézami, si mi di azot, zot i pé kroir amwin vi ké mwin lé azé é mèm in pé izazé ; donk ala sak mwin néna pou di : Sé in n’afèr-in kozman - i romont déza in bon pé d’tan. Shomin boi d’nèf lété pankor blaké, é dann la fontène madam toutou in lo d’inn bonté parl pa koman téi koul. Donk dann tan-la, si in famiy té i ésspass in pé son vizite out kaz é si wi trouv sa in pé drol, té possib larg ali in foutan konm sak mwin la mark an-o la. Lé possib ou téi vèks lo mond, té possib ossi lo moun téi di dann son fon d’kèr : « Lé vré sa i fé in pé d’tan mwin la pankor parti son kaz. » Soi lo moun téi fash, soi téi répar son fote. Alé ! mi kite azot rofléshi la dsi é ni artrouv pli d’van. Sipétadyé !