Mi souvien, kan moin téi sava lékol, l’avé in vyé profésèr. Zordi li la fine kapote l’ot koté la vi. Souvan dé foi li téi s’anplègn pars d’apré li, son bann zélèv la pa kass kate pate in kanar-si zot i vé, la tyé kouyon pou pran son plas. Moin pèrsonèlman, in kozman konmsa té i fé dsi moin konm lo d’si fèye sonz pars mon savoir, a moin, téi sort dann Témoignages épi dann tout bann zoinal zanfan konm « Vayan »épi « Pif lo shien ». Mi doi dir azot dann sak moin téi lir moin téi trouv dé shoz intérésan é si mon vyé profésèr téi koz galman pou moin, moin téi pans mèm shoz pou li. Tout fason l’intélizans marmaye néna son sours dann l’intélizans lo mètr é vèrsi vèrsa. Alé ! Mi kite azot rofléshi la dsi é ni artrouv pli d’van. Sipétadyé !