Matant Zélida la ékrir Justin :

Mon shèr nové, mon spès salté, rouj-de-fon dovan l’éterniité, m’a dir azot fransh vérité, mi konpran pa tout lo shari-vari zot l’apré fé pou soi dizan protèz la natir é anpèsh mésyé Didier fé son NRL la plipar d’moun i atann sa pou roul an sékirité. Arète in kou : zordi i protèz rokin, domin i protèz galé, apré domin in pti bébète i fo pa toushé. Asé, arète in kou, la tèr, konm la mèr, lé fé pou l’onm é sé ali d’roganiz sa konm lé bon pou li. Zanimo la tèr, la mèr, lo syèl, la natir lé la pou l’moun, in poin sé tou. Sé kant mèm l’onm ké lé dann milyé la kréasyon bondyé kant mèm. Zot i vé, zot i vé pa lé konmsa. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, m’a dir aou, lé fatigan antann z’afèr konmsa. M’a dir aou solman in n’afèr : matant rant Sin-dni épi la Possession na in l’androi i apèl lantanier é dann la mèr kosa nana ? Na in résif apré formé. Bann z’onm de syans i apèl sa in bébé lagon. Bann l’antropriz l’apé sharj galé é sharj lo rosh la dsi si tèlman, é sa moin la vi dsi lo fime la tourné, ké l’apré mète an danzé lo bébé lagon avèk son bann koray, avèk l’avnir bann poisson va viv la dan. Matant, m’a dir a ou, l’onm na poin lo droi détruir la natir konmsa é sak i lèss fèr, sanm pou moin zot nora dé kont pou rann. Kan mi di rann kont, mi di konplis é lo konplis, mi vé anparl l’éta, mi vé anparl lo gouvèrnman, parti sosyalis mèm konplis avèk la droite konsèy réjyonal.
An plis ké sa, m’a dir aou, mi pans pa lo kréatèr la domann l’om pou alé dévast la natir. Mèm si ou i di la natir lé fé pour l’om, l’om la pa propriyétèr, li lé d’pasaz é sé ali de lès la tèr dann lo méyèr éta k’i fo pou son bann désandan ? Nou lé lokatèr, nou lé pa propriyétèr. Tok ! Pran sa pou ou.