Na poin lontan l’assanblé La Martinik la désside fé avèk la lang kréol Martinik in dézyèm lang ofissyel. Bien sir la késtyon lé vérouyé ziska zordi par la konstitission la Répiblik franssèz é lo Prézidan konsèye réjyonal la Martikik la rokoni li mèm, sé in vote ké zot la fé mé tribinal va kassé an atandan in zour in modifilkassion La konstitission

La pa pou domin, lé vré, mé pétète pou apré, akoz pa ?

Laba dann in péi i apèl La Corse, konsèye réjyonal la pran lo déssizyon parèye La Martinik mé gouvèrnman la Franss la pa aksèpe sa, solman mi sorte lir Prézidan La Franss la désside angaj in konvèrssassion dsu lotonomie pou la Corse a kondission èl i rèss dann la Répiblik é la promète ossi diskite lo ka la lang kors…

Dizon la pa arienk dan la Répiblik franssèz sa i éspass. Mi sorte lir laba dann Lo Roiyome L’Espagne, gouvèrnman la désside dann la shanm dépité — la shanm bass — plizyèr lang nora zot plass : sé lo ka pou lo kastiyan — donk l’éspagnol ofissyèl — sé lo ka pou la lang bask, pou lo Gallicien épi pou lo katalan. Mé i fo dir azot néna plizyèr lang ankor i trouv pa zot plass dann lo déba politik ofissyèl ; donk éspéron i fé ankor d’ote pti pa.

Pou kossa i fé sa ?

Sirman pars lo bann nassyonalism l’apré révéyé é lo bann pèp — sak i san zot kor — i domann zot droi égzisté. Mé mi panss nou va rovni la dsi pars konm zot i koné sa sé in sobatkoz kapital, pou toute pèp gran konm pti mé konm kamarad Paul téi di : « Pti pèp, na poin sa ! Na poin pti lang non pli ! »

A bon antandèr salu !

Justin