Médame, Méssyé, la sosyété koze èk mwin sé koze èk in kouyon mé sé o pyé d’lo mir k’i oi lo vré masson. Mézami kozman mwin la marke an-o la mwin la trape sa dann in kozman Nikita Kroutchev la di. Dann tan-la lamérik avèk l’urss lété an konkiranss pou la konkète léspass é l’Urss lété in pé an avanss é l’amérik téi réissi pa dann son bande lantropriz. Alor inn i gaskone l’ote ziska k’in zour lo dirizan russ i di son kozman an foutan pèrsone la pa obliyé. Mé si ni lèss sa de koté, ni konstate de toutan lé konmsa : in pé i fé gran déklarassion pou zéro rézilta, é d’ote i trape in rézita épi i fé l’anonss apré. Azot de oir kossa zot i profère an parmi lé dë kalité mé la pa pou sa nou va shanj lo monde. Sar touzour konmsa avèk son dë kalité d’moun. Alé ! Mi kite azot rofléshi la dsi é ni artrouv pli d’v an. Sipétadyé.