Lo son ni antan lé pa bon ditou pou banna koté la rout litoral, pa par rapor laboutèyaz la rout, ousinonsa lanmérdman travo, par rapor, firamézir léto i rosèr si lo nouvo santié, zot va di lé normal néna léto vik lé d’si in santié travay. I prétan la brigad finansièr èk zandarm, douanié bann boug zinpo tousala i kontinié rodé. Kisa i sar ostinn èk la lwa la d’si ? Lo prézidan la rézyon pou son par, i di konm sa, pou li lé normal la lwa i kontrol a li vik lo santié lé gro.

Alorss domoun i lash a zot. Néna i di “Na pwin la fimé san fé“, pou dot “zandarm i pé pa rant la kaz domoun konm sa san rézon“. Pou dot gro léspri sagrin, dopi sértin tan, rolasyon rant nou èk lé sésèl lé plito bon, na pwin aryink la vanyi ki sirkil rant nou, lé plito bon pou nout tout i di. Dot moun pli malfondé i di osi, konm néna in gro takon larzan an zé, pétèt lo diab la tant in pé. Pou lèr konm désértin ni di “Lès la zistis fé son travay“.

Bann boug la rézyon lé sorin pou sa, zot na pwin aryin pou roprosh a zot, sé sak zot i prétan ozordi. Pou zot lo bri d’la mèr i pé pa anpèsh bann pwason dormi. In proverb rényoné i di osi, i konsèrn touzour pwason “Lèrk lodèr lo kri i lèv toulmoun i argard pwason“. Sépousa i prétan bann moun la drwat la déza prévwar in plan B pou zéléksyon rézyonal, si zamé lo nivo la mèr i mont, si lo plan A i koul. Lo plan B lé la, si léto i rosèr tro for.