Na pwin d’gou èt oki ousinonsa èt an parmi moun oki. Mi sort antann in konvérsasyon rant dé dalon. Boudikont, sizé daktialité, d’si lo kanabis “Oté i prétan dir garson Batis i fim zamal é néna i di minm, i fim télman in kantité domoun i di li dor dodan , Son dalon i réponn a li“. A lèrkilé zordi in moun na lo dwa ral in taf tanzaot é néna minm i doman pou légalizé é i prétan dir i pé ansèrv konm médikaman, donkalor na pwin pou kass la pat in kanar.

E li arzout èk sa, dayèr na pwin aryink li i fim, sad doktèr Pilon osi i fim. Ouè mé sad doktèr Pilon li fim zis pou défié son papa, zis pou fé shié in pé son gramoun, dizon li fim zis pou kass lé kui, tandis sad Batis i prétan dir, li la tonm dodan pou vréman é sar difisil ansort a li konm i di. Domoun i di “Bèf i fé anmar a li èk la kord tandis domoun i fé anmar a li èk son lang“. Dawar lé vré.

Donkalor lo maléré, lo boug oki ki fim, li si li fim, li sé in dévérgondé, in san bin-yè, in kokol gran shomin ? Sétadir li vo pa in kanèt é lo garson doktèr Pilon alors konm li fim dann salon, èk dé pot, trakass pa, li va ansort a li. Mézami, zot i wa komansa dann in ti kozman ni gaskongn nout moun. A mwin sak mi rotyin dann tousala, san pran la kolèr, kan ou lé oki na pwin mwayin pou shapé. Na pwin d’gou èt oki, Baya !