Nou lé fatigé èk sa, ariv sak néna pou arivé la d’si ousinonsa sak zot va fé sar bon pou mwin ou ankor tir inn mèt lot i shanz pa granshoz, oila an kèlké sort kozman ni antann èk domoun tansi kan ni parl a zot zéléksyon kantonal. Tir pa pou mwin, si sé ryink dé mwin minm, alé marshé zot tout, dékal a zot si koté. Domoun i vé pi, mi di a ou. Sanm pou mwin sa in zéléksyon konpliké, néna travay pou fé ziska mars lané proshinn. Pou di, minm bann kandida osi i bouskil pa, tanzaot ou antann in i vé alé, ou pétèt néna i pouss par dérièr osi, mé ou san konm si li sava sé in pé èk lo frin a min, in pé kontrokèr, konm si li lé pa tro sir d’li minm, tousala pou di sora difisil ral domoun, kiswa zélèktèr, kiswa kandida. Poukoué ? Sanm pou mwin sa la pa in zéléksyon promié shwa sa pou zot.

Déza banna la rofé bann kanton, sanm pou mwin pa an mié, vik avan té in pé pli fasil pou konprann té i konfond souvan in vil èk in kanton é si navé dé ou trwa kanton té sir té dann minm vil, zordi la pi konm sa in kanton i pé èt si dé vil, néna minm si trwa vil. Lo bann boug la fé sa té fité, zot la tripatouy in pé, la fé konm in trikmardaz pou sov a zot boudikont. Zot i koné shak fwa i fé in dékoupaz, néna touzour i trouv a rodir. Oilali-oilala, banna i travay pa konm la bouji, i travay pa an lanvèr, i ésèy fé in manièr pou ansèrv a zot an promié, la kal sa zis pou zot, pou fé gign kamarad é patati-é patata. Nou lé abitié èk sa.

Mé souvan-dé-fwa i spass pa konm zot i vé, souvan-dé-fwa sak i fé kui manzé, la pa li i manz touzour, sak i konstri la kaz, la pa li i dor dodan, sak i sharoy do lo, la pa li i bwar. Minm si i di osi sak i fé gato i lish son dwa, mé zékzanp konm la o, sa lé plin, sa i mank pa pou di osi tanzaot ou pé fé in nafèr ki profit pa ou touzour. Pou rovni si zéléksyon a mwin osi mi san pa tro, na pwin inn i avans in program, mi wa pa in prozé i sort, ni atann, shakinn i atann pou war. Sanm pou mwin ozordi lanbians lé konm dann in vié télé. Na pwin lo son, na pwin zimaz.