Isi La rényon, na in bonpé parti politik. An parmi nana dé parti i partisip l’altèrnans dan la répiblik, parti sosyalis épi l’UMP, inn i apèl lagôsh, l’ot i apèl ladroit. Zèli i mank pa zot,kisoi dépité, kisoi sénatèr, kisoi konséyé zénéral, konm réjyonal... Kan la sityasion lé dann malizé, sanm pou moin zot lé la pou donn zot l’opinyon, pou propoz in bon solisyon, pou kozé a tou lo moins. Alé kroir sa zot ! i diré zot la pèrd la parol, konm di lo kont zot lé konm martin ki kouzi, pars i paré in martin kan ou la fé ali in n’afèr kriyèl konmsa, li koz pi. Moin la zamé vi, mi vann lé shoz konm moin l’ashté !

La sityasion lé dann malizé pou vréman. Sak di non, ébin li la poin lo zyé pou gardé, zorèy pou antann, lèrla li la poin la boush pou kozé non pli. Touléka sé sak bann sindika, bann z’asosyasion, épi ziska nout parti i pans. Pars, pou vréman nana in bonpé klignotan lé dann rouj ; kisoi dsi bann z’inégalité, kisoi dann la povrété, kisoi lo bann lojman, kisoi l’ilétrism, kisoi ankor nout prodiksion intèryèr, kisoi dsi la késtyonn shomaj, kisoi ankor dsi la késtyonn bann rényoné i sèy artourn travay isi épi i gingn pa, kisoi kann l’avnir lé bien noir. Talèr, i sava désid anvoy in kantité amontrèr isi é bann amontrèr rényoné va anvoy azot dan La Frans pou zot fé zot éstaz… Armète la dsi la késtyonn rokin, la késtyonn délinkans, la vyolans kont bann fam..Konm moin la di na dé shoz i marsh mé sak i marsh pa, mi pans i fo trouv in bon solisyon pou zot, é lé pliské irzan.

Bin bann dépité sosyalis la poin solisyon don zot ? Zot i koné pa kosa i fo fé pou lo péi ? Sansa zot la pèr i toush zot z’intéré ? L’èr la vérité l’arivé sé pou sa zot lé san voi ? A moins ké tout i fé sanblan baz dsi lo prézidan pou amène bon solisyon pou zot ? Kom di lo kont, kont dsi baton tonton pou travèrs la rivière ? Sansa zot i kont dsi li pou an avoir la vizyon ké zot na poin, mé na vizyon épi vizyon : nana sak nana in projé pou l’avnir..sa i apèl in vizyon pou l’avnir ; épi na sak i oi lé shoz ké na poin, konm ki diré in miraz, :é sa sé in n’ot kalité vizyon !

Justin