Moin la touzour antann dir : lo gou sa i diskite pa ! Konm la koulèr osi, i prétan sa i diskite pa. Poitan i di pa in plézantri mové gou ? I di pa d’in n’afèr li lé zoli, o sinonsa li lé vilin. Sa i vé dir ou i pé diskité zistoman. Tèl shoz, pou inn lé zoli, lé bien aprésyé, lé bien valab . Pou d’ot sa lé pa ditou konmsa mèm lo kontrèr. Shak tan nana son gou é lo gou i shanj avèk lo tan. Pou kosa ? Pars lo gou i koréspon pou in tan doné : avan té pa konmsa ! Apré lé pi kon sa ! Mèm la mod i shanj san aré, l’éstétik i shanj, lo bo avèk lo lé lé pi parèy. Tèl shoz i koréspon lo bon gou momandoné, i koréspon lo mové gou in syèk sansa dé syèk apré. Alé ! ni artrouv pli d’van !