Matant Zélida lé ékrir Justin :

Mon shèr nové, mon spès salté, rouj-de-fon dovan l’étèrnité,

Moin lé sir ou i doizète kamu dann l’afèr mi sava ésplik aou. Konm tout lo moun ou i koné air-autral i sort ashté in bèl l’aviyon-in Boing 787 d’apré sak i di. Sa lé shèr é lkonm i trouv pa l’arzan dsou la pat shoval sa i vé dir nout konpagni réjyonal i done lo grin. Arzout èk sa mésyé Didier avèk tout in délégasyon i sava Seatle an Amérik pou rode lo l’aviyon. Sa la pa in n’afèr bèl sa ! Sa la pa in n’afèr pou mète Larényon anlèr sa ! Okilé bann rouj la-dan ? Zot i rès konm martin i gingn pi kozé-konm martin ki kouzi par l’fète. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, biensir moin lé pa dakor avèk ou. Lé vré air austral i ashète in l’aviyon amérikin. Lé vré osi la bann konsèy réjyonal i sava la-ba avèk tout son ékipaj pou ramenn lo zoizo an fèr isi-o fré la prinsès ! Mé a bien rogardé, nou lé an 2016 : sizan apré 2010 é si lé shoz l’avé déroul konm k’i fo nana sink z’ané o moins La Rényon noré dé air-Bus 380 avèk in gran kapasité, in l’avyon i fé kaziman pa lo brui, i polyé moins, é sa nora pèrmi anou drès dovan lé z’ot konpagni avèk in voiyaj bon marshé é san ké nou rényoné ni doi pèy lo soi-dizan kontinuité téritoryal. Alor, dans azot si zot i vé, fé lo fyèr, dansé mé obli pa nana touzour in zour i apèl domin. Tok ! Pran sa pou ou !