Kossa l’arivé l’ané 1663 dann lil bourbon ? Douz pèrsone l’ariv par bato pou akost laba dann Sin-Pol. An parmi lo douz pèrsone l’avé dê zéropéin, épi dis malgash. An parmi lo dë zéropéin listoir la rokonète arienk lo nom Louis Payen, pou lo dézyèm i koné pa bien kissa i lé...Sak lé sir sé ké, trépé d’tan apré lo débarkman, bande malgash la parti zot koté é lo dë zéropéin la rèss dann la grote laba Sin-Paul.

Kan Etienne Regnault l’arivé l’ané 1665, toute la bande arivé an 1663 la réini é apré sa lo péploman lil bourbon la komanssé, dousman ti dousman mé la komanssé kan mèm é sa i fé 360zané demoune lé instalé issi dann noute péi.

Sak i annuiye amwin in pé ladan, sé ké sa i pé zète la vérité, osinonsa inn parti la vérité. An fète, ni di sa pars ni koné pa pliss dsi lo sizé é souvan dé foi lé konmsa dann listoir La Rényon sirtou dann promyé tan.Ni koné in boute la vérité é pétète ni konétra pa pliss :

Lo dézyèm franssé té ki ? i paré i koné pa avèk sèrtitide. Koman lo dis malgash téi apèl ?i koné pa non pli sof pététe inndé nom. In rézon siplémantèr pou la roshèrch kontinyé pétète pou trouv sa sansa pou trouv d’ote zafèr. Zot i trouv lé flou ? Listoir lé souvan défoi in pé flou, mé sa i anpèsh pa ki fo kontinyé rodé.

A bon antandèr, salu.