Oté

« Néna arien pou fèr avèk promès demoun kan lé bu »

In kozman pou la rout

Justin / 12 zwiyé 2019

JPEG - 43.6 ko

Médam, Mésyé, la sosyété zot i koné kèl pli gran promèss in moun bu i pé fé ? Biensir li pé promète ninport koué. Li pé mèm promète sak ou i vé li promète, mé lo pli gran promèss moin la tandi in moun té pa tou sèl apré fé, sé dir : « Mi promète, mi boir pi ! Mi promète mi boir pi ! » . Mé élas Ménélas, mon kèr lé an filas moin la rarman vi in soular tienbo son promèss. Pou kosa ? Pars zot i koné kan ou lé fine abityé avèk la boisson lé difisl s’an pasé. Pli pir, kan ou la fine rogout in pti pé, ou lé parti. Ou i komans par koz initil, aprésa kan ou i marsh ou i kont shomin. Talèr ou lé riskab kalbité shaviré é an plis ou i pèrd kontrol dsi ou mèm-self kontrol konm bann zanglé i di. Sépa si talèr i fé pa pète bataye dann son prop famiy. Alé ! Mi éstop tèrla é pou sak lé ankor tan arète vite avèk la boisson pars sa sé out pli mové z’énmi é pli danzéré ké ou i pans. Mi kite azot rofléshi la dsi é ni artrouv pli d’van.