Médame, Méssyé, la sossiété, koze èk mwin sé koze èk in kouyon mé sé o pyé d’lo mir k’i wa lo masson.

Mézami ala, d’apré mwin in kozman lé fassil pou konprande, la pa bézoin ou lé tro intélizan pou konprande son sanss prope. Mi panss pa in kozman konmsa la bézoin in gran démonstrassion. Mé sak lé sir, sé ké pou trouv son sanss figuiré, pli zénéral, i fo fé travaye la tète. Mé néna in pti zistoir avan bande gran kalkil : zot i koné in zour mi ariv dsi marshé o puss dann in gran vil La franss, in vandèr l’apré baratiné, li propoz : sète pèr d’shossète, in paké madlène, in tablète shokola pou dis fran. Mwin la pran mé shak père d’sossète la fé in zour, lo madlène la pa fé in somenn é shokola la parti pli vite ankor : zot i oi zour-la mwin la fé in n’afèr.

Mé pou arvnir dsi noute provèrbe mi panss pou oir kékshoze é pou konète kékshoz i fo ou lé bien plassé. Mal plassé, wi sava manti, sansa ou lé dan l’érèr.

Alé ! Mi kite azot rofléshi la dsi é ni artrouv pli d’van Sipétadyé.