In kozman pou la route

« Néna goni ton kaz ? »

11 désanm 2023, sanm Justin

Médam zé méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.

Mézami, mi ansouvien bien, kan mwin la rante dann la klass sizyèm, l’avé in proféssèr franssé épi latin, mi obliye ar pa li. Pars bononm-la té abityé koz an bète avèk nou. Si tèlman plizyèr foi mwin la prépar amwin pou gingn kouraz pou di papa-momon, tire amwin lékol-la.

Konbien foi mwin la antande ali dir amwin sansa d’ote marmaye : « Domann ton papa in bèf pou ral dsi la ké ! », sansa ankor d’ote kalité moukataz. Si tèlman mwin téi lite pi pou gingn fé mon bann dovoir, sansa aprann mon bann losson mé par toute moiyin mwin téi fé léfor pou ké li romarke pa mwin. Mwin téi éssèye d’éte transparan. Mwin téi vé disparète korzébien.

Anfin lo tan la passé, mwin la fé sak mi gingn é sirtou mwin la dévlope la ène plizyèr proféssèr mèm plizyèr zadilt. An kalité d’yab lé o, mi pé dir azot mwin la soufèr. Pou mon bien ? Sé sak mon famiye téi di é mwin téi panss pa konmsa. Alé ! mi kite azot rofléshi la dsi é ni artrouv pli d’van, sipétadyé.

Justin

NB — Néna goni ton kaz ? Sa i vé dir ton kaz la poin la porte é sé pou sa ti fèrm pa porte déyèr toué vik toué néna ziss in goni konm fèrmtir-rouvèrtir. Poinn také, ziss in goni pou pousssé é li téi ropran son plass toussèl. Mwin té lo dèrnyé dé dèrny dann tan-la.

Padport

Signaler un contenu

Inn modékri, inn ti lavi, inn komantèr ?