Oté

« Néna gouni ton kaz ? »

In kozman pou la rout

Justin / 25 avril 2018

JPEG - 43.6 ko

I pé pa dir sa in provèrb vi k’li lé pa inn. I pé pa dir non pli sé in kozman i antann souvan. Moin la antann sa kan moin lété dann klass sizyèm. Mon profésèr fransé, in sèrtin Ti Malol té i yèm bien la port vitré lété fèrmé é konm souvan dé foi nou té i obliy ral la port shassi, li téi rapèl anou son règloman ali é li té i apostrof anou avèk kozman moin la mark an-o la. Akoz goni sansa gouni ? Pars dann tan mi anparl azot téi ariv l’avé poin la port dann la kaz an paye sansa dann kalbanon. L’avé in goni téi ansèrv konm port sansa konm fénète. Sépa si in pé téi apèl pa sa galman kash mizèr pars té i anpèsh oir la mizèr anndan. Mé par l’fète lo kash mizèr lété lo lanba si mi tronp pa. Alé ! Mi lèss azot rofléshi l dsi é ni artrouv pli d’van. Sipéadyé !