Mé zami banna l’apré tourn anou an bourik. Zot I rapèl kan lo prézidan la di néna in avan lo covid-19 épi nora in apré é forséman l’inn épi l’ot sar pa parèye ditou. Bann flatèr lo prézidan la mète a bate la min épi la répète rangène-la ziska fé gingn demoun fatig dan la tète.

Mé konm i di souvan dé foi : « shass lo natirèl, li arvien gran galo ! ». Moin néna dan l’idé konm l’inprésyon sé sak l’apré spassé.

Mi pouré rode plizyèr zégzanp, mé inn-dé sar sifizan pou moin. Zot i souvien la fyèv Ebola, kan sa la déklar dann l’Afrik dé l’ouèst, bann zafrikin té in pé tousèl. Rozman pou zot bann péi konm Kuba la vni avèk in kantité pèrsonèl médikal, in ta médikaman, épi son bann roshérch la pa lèss banna tonbé.

Mé la pa tro vi bann péi l’érop : gran prométè, pti donèr. Sirtou moin la pa antann bann laboratoir la lans bann roshèrc pou trouv kisoi in bon vaksin, kiosi in médikaman, kisoi in kashé pou tir doulèr.

Sa lé pa fé pou étone amoin, pars kan nou la gingn chikungounya, la vréman parl in vaksin, mé vaksin-la la pa ariv zamé é nou bann péi tropikal nou la sèye ansort anou konm nou téi gingn. Apré nou, konm d’ot, nou la gingn la deng é dopi in bon bout tan, nou la pankor sort dann tablatir-la.

Kan s’kou isi lo covid-19 la komans vni in pandémie toultan ou i antann parl vaksin, sérome, médikaman é si la pankor trouvé antouléka i shèrch. Pé sfèr sé pars maladi-la i pouak sirtou ziska zordi bann péi friké-Romark banné i pov l posib zot osi zot i gingn zot doz mé pou lo moman sé bann péi rish lé bien anmayé.

Avèk tousala i gnor pa larzan, lo profi, lo bann dividann é I éspèr – pou sèrtin ramas in bon paké-alor in tan d’avan, épi in tan d’apré ? Ok ! Mé si lé dé lé parèye. Moun lé paré pou ziré-krashé.