Médam zé méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.

Mézami, kozman mwin la marke an-o la, mi pé dir azot sa sé in n’afèr mi apréssyé pou vréman.Pé s’fèr sé pars mwin la fé inn vi pou shèrch a vanjé. A vanjé pou koué ? Pars mi éstime la pa trète mon péi konm k’i fo, la pa trète son moune konm k’i fo, parèye pou noute lang, parèye pou noute kiltir, parèye pou noute jéni..

Pétète zot va dir sa lé konm in konplèks dan mwin, in sorte konplèks d’infèriorité mé o fon la pa sa, pars boudikonte mwin lé fyèr mon péi, mwin lé fyèr son boté, mi ador son kiltir, mi yèm mon lang kréol konm bonpé d’moune dsi la tèr i yèm zot lang matèrnèl-promyèr manifèstation lo jéni d’zot pèp.

Bin alor pou kossa mi apréssyé kozman mwin la marke an-o la ? Pars néna in zour i apèl domin é domin va vnir lo zour la rokonéssanss noute valèr. Kékpar mi panss sa lé ékri.

Alé ! Mi kite azot rofléshir la dsi é ni artrouv pli dvan, sipétadyé.