Matante Zélida la ékrir Justin :
Mon shèr nové, mon spèss salté, rouj-de-fon dovan létèrnité, si mi konpran bien manyèr bann rouj l’apré fèr la, sé in fason pou domann ankor l’otonomi sa ! Pou moin sé sa é la pa in bougrèss konm moin zot sar kapab roul dann la farine. Manyèr bann rouj mi koné, zot i profite kékshoz i tourn pa ron pou dir si lété bann rényoné pou tienbo la manète, lé shoz noré pa mal marshé. Solman alé oir, na osi dé shoz i marsh pa kan sé bann rényoné lé o manète. Alor souète in pol désizyon La Rényon pou aplik sa la santé… Plito k’in pli bien, lé riskab d’ète in pli mal. Tok ! Pran sa pou toué !

Justin la fé pou répons :
Matante, pou komansé é ou va éskiz amoin tourn lo fèr dan la plé - dann lo boubou si ou i vé - mé mi doi rapèl aou parti kominis épi d’ot moun résponsab la touzour sèye mont bann pol konpétans isi La Rényon. La plipar d’tan lété bann kominis avèk Paul Vergès la sèye pous sa an avan, mète anlèr si ou i vé. Pou inn bone rézon pars si ou i vé bien fèr i fo néna isi dann lo péi lo bann konpétans k’i fo é sa i tir pa sou la pate shoval, i fo po sa in bann moun formé konm ki fo.
Mé oila, bann shanpion la droite la fé sak téi falé fé pou ral rényoné déyèr, pou poz lanspèk pou anpèsh anou avansé. Nou kominis épi d’ot vré rényoné, nout idéal lété é lé touzour d’mète bann rényoné anlèr pou inn bone réisiste shé nou dann nout patri La Rényon... Lé vré ké souvan défoi banna – bann trayizon-la touzour béné fisyé lorèye épi la konplisité avèk Paris é dann tout domenn i fé konmsa dopi talèr plis soisant dis zané.
Mé zot i vé zot i vé pa, néna in zour i apèl domin é zour-la bann konpétans rényonèz nora lokazyon pou afirm azot dann lintéré lo pèp rényoné. Tok ! Pran sa pou ou !