Zot i koné néna demoun néna vilin manyèr é sak néna zoli manyèr-inn sé lo kontrèr par rapor a l’ot. Antansyon, mi vé pa anparl lo moun néna joli manyèr dann son péi, mé la pa in zoli manyèr dann in n’ot péi. In légzanp ? Tèl androi lé bon ou i manifès out kontantman avèk tout kalité zès, épi tout kalité mouvman, kriyé, pléré é tout sak i s’ansui. Dan d’ot landroi ou i doi fé konm lo dsi fèye sonz. Mé tousa pou dir la pa partou ou néna zoli manyèr, konm la pa partou ou néna vilin manyèr… Sof ! Mé, si ou i gingn ou i adapt aou : ou i rogard bien koman demoun i viv dann lé zalantour é ou i fé parèye. A par k’sa, kont pa dsi kashé, pilil, siro, kansréti sipozitoir pou done aou zoli manyèr, kan sréti in bon tizane sinp. Sa sé in n’afèr i marsh pa, sa lé pa éfikas ditou ! Sak lé éfikas sé out bon kèr épi out bon kalité d’akèye. Lé zot z’afèr, sé la poud pèrlinpinpin mi di azot. Alé ! Mi kite azot rofléshi la dsi é ni artrouv pli d’van. Sipétadyé !